AMAKURU MASHYA YA KOMISIYO

IKIGANIRO CYA KABIRI KU MIKORERE N'IMYITWARIRE
Y'AMASHYAKA N'ABANYAMASHYAKA NYUMA Y'INZIBACYUHO.

(Kuwa 23 Kamena 2002)

Ku nshuro ya kabiri, Komisiyo ishinzwe gutegura Itegeko Nshinga n'ivugurura ry'andi mategeko yateguye ikiganiro-mpaka ku mikorere n`imyitwarire y'amashyaka n'abanyamashyaka nyuma y'inzibacyuho.
Icyo kiganiro cyabereye muri Centre Culturel ya Gitarama, kiyoborwa n'Umunyamabanga Nshingwabikorwa wa Komisiyo Dr. MUTSINZI Jean, kinitabirwa n'imitwe umunani ya politiki yemewe mu Rwanda, ariyo, FPR Inkotanyi, MDR, PSD,PL, PDC,PDI, UDPR na PSR.

Mu ijambo ry'ikaze, Umuyobozi w'Intara ya Gitarama Bwana NSENGIYUMVA Fulgence yavuze ko kubona ikiganiro nk'icyo kibera mu ntara ya Gitarama , bigaragaza ko Leta ikomeje gushyira mu bikorwa gahunda yo kwegereza ubutegetsi abaturage, ati abaturage b'Intara ya Gitarama ntibazahwema gufasha Komisiyo kuzuza inshingano zayo batanga umusanzu w'Ibitekrezo ku Itegeko Nshinga ririmo gutegurwa.

Mu izina rya Komisiyo, Umunyamananga Nshingwabikorwa wa Komisiyo Dr. MUTINZI Jean yavuze ko amashyaka ya politiki afite uruhare runini mu miyoborere yIigihugu , ati urwo ruhare rushobora kuba rwiza cyangwa rubi nk'uko byagaragaye mu mateka yaranze Igihugu cyacu ; ati nshingiye ku nama nyungurababitekerezo Komisiyo igenda igirana n'ibyiciro bitandukanye by'abanyarwanda ku Itegeko Nshinga , byagaragaye ko abaturage bafite impungenge ku mashyaka ya politiki bitewe n'uko atagize imyitwarire myiza mu myaka ishize.

Mbere yo guha ijambo abari bahagarariye imitwe ya politiki yemewe mu Rwanda, Radio Rwanda yanyujijeho amajwi y'abaturage bagaragaza impungenge zabo ku mashyaka ya politiki.

Muri icyo kiganiro cyanyuze kuri Radio Rwanda, abahagarariye imitwe ya Politiki yemewe mu Gihugu bakuze kwemeranya ko koko impungenge z'abaturage ku mashyaka ya politiki zifite ishingiro, bati ariko ibyo ntibyagombye kuba intandaro yo kuvuga ko amashyaka adakwiye kubaho ; bati ababivuga nabo bagombye kugaragaza icyayasimbura kugira ngo isimburana ku butegetsi rishimangire demokarasi mu Rwanda. Abahagarariye imitwe y'amashyaka bongeye kugaragaza ko amashyaka ubwayo atari mabi, ko ahubwo yicwa n'abayarimo bitewe n'inyungu zabo bwite , bati amwe mu amashyaka yafatanyije n'umuryango FPR Inkotanyi mu kurwanya ingoma y'igitugu yateguye ikanashyira mu bikorwa itsembabwoko n'itsembatsemba byahitanye inzirakarengane z'abanyarwanda zingana na miliyoni, abanyamashyaka ya politiki banagaragaje ko nyuma y'icyo gikorwa amashyaka yagiye muri Leta y'Ubumwe bw'Abanyarwanda yiha gahunda ndende yo kubaka Igihugu ishingiye cyane cyane kugarura amahoro n'umutekano no gushimangira ubumwe bw'abanyarwanda hagamijwe guca umuco wo kudahana, ubwiyunge n'ibindi .

Abahagarariye imitwe ya politiki yemewe mu Rwanda bemeranya n'abaturage ko imikorere y'amashyaka ya politiki mu myaka yashize itari myiza, bati ariko kuva Leta y'Ubumwe bw'Abanyarwanda yajyaho, amashyaka yakomeje gukorera hamwe mu rwego rw'ihuriro ry'amashyaka ya politiki, hagamijwe gukorera mu mu cyo, guca urwicyekwe hagati ya yo , kubaka Igihugu kimwe mubwumvikane n'ubwizerane, ibyo na byo bikaba ntaho bibangamiye ubwigenge bw'amashyaka ariho ubu mu buryo ubwo ari bwo bwose.

Mu rubuga rw'ibibazo n'ibitekerezo, abaturage bashinginye ku bisobanuro bari bamaze guhabwa n'intumwa z'imitwe ya politiki yemewe mu Rwanda bifuje ko mbere y'uko amashyaka ya politiki yemererwa gukorera mu bwisanzure, abaturage babanza kugaragarizwa ko amashyaka ahuriye muri Leta y'Ubumwe bw'Abanyarwanda atandukanye n'ayabayeho mbere y'itsembabwoko n'itsembatsemba haba mu myumvire no mu myitwarire.

Mu bisobanuro byabo abanyamashyaka bahumurije abanyarwanda bose babizeza ko batazigera bashyamirana ko ahubwo bazakomeza gukorana mu bwumvikane nk'uko bimeze ubu birinda guhungabanya umuryango nyarwanda, banagaragaza ko hagomba kubaho Itegeko rizagenga imikorere y'imyitwarire y'amashyaka n'abanyepolitiki ndetse hakanabaho n'ibyemezo byafatirwa ishyaka cyangwa abanyepolitiki bagaragaraho imyitwarire mibi.

Mu gusoza abahagarariye imitwe ya politiki yemewe mu Gihugu, bongeye gushimira Komisiyo kubona ikomeje kubafasha gusubiza impungenge abaturage bafite ku mashyaka ya politiki, kugira ngo u Rwanda rutazongera kugwa mu icuraburindi, banayizeza kuzakomeza kuyiteta inkunga cyane cyane mu bitekerezo hagamijwe kuzagera ku Itegeko Nshinga rizarama rikanabera buri munyarwanda.